اجمل ابوذيه.............هاك الكلب بيدك اطحنه

هاك الكلب بيدك حيل طحنه
أمس فوك النجوم واليوم طحنه
شبدينه وبالعشك ياناس طحنه
غشمه وكلوبنا تحب الأذيه


تظل نجمه ياضي العين بسماي
ويضل اسمك صديق العمر بسماي
ما يروي العطش بجفاك بس ماي
العطش ترويه من تسأل عليه

افكر بيك يا حبي ولا انام
ولا غمض جفن عيني ولا نـام
احب اكعد يمك ولا نــــام
بعيد وشوفتك حسرة عليــة


انا الصياد صادتني شبكتك
دخيل الله شكثر حلوة شبكتك
ادك عليك مشغولة شبكتك
كتلك بالجذب بس رمش عليه


أظل أكتب شعر للطيبين وأنشد
وأسأل على الصاحب دوم وأنشد
وأصير حزام وكت الضيج وأنشد
لكل عزيز وغالي عليه


عذرا لون روحي .. حاسبتكم
لانكم جزء منه .. حاسبتكم
بجاه الحسن تعطل .. حاسبتكم
شاشه وكيس والفارة سويه


الك ياما نبض كلبي ودكلك
واطحن بالحجي ناعم وادكلك
شكدباليوم ارمشلك وادكلك
درمش بالجذب مره عليــــه


يانور العين مرسالك وصلنه
ودمع العين بلل كل وصلنه
امانه عليك لاتكطع وصلنه
وخلي دوم عشرتنه سويه


غاب الكمر من شافك ولا هل
ولغيرك ما نزل دمعي ولا هل
مالي دار من بعدك ولا هل
عزيز ويصعب فراكك عليه

نشدت الناس عنك وانت هينه
وعلى فراكك تلفنه وانتهينه
الكلب انت تعذبه وانت هينه
ويضل اسمك حلو وغالي عليه



خزرة عيونك طير شاهين
عليك الروح والدلال شاهين
يالجمالك صعد فوك الهام شاهين
والك نبيلة عبيد تأخذ تحية

سابيني بجمـــاله اوطول شعره
انا اموت من اسمع ابيات شعره
انا بيني وبين المـــوت شعره
حبيبي اشوكت تلــــــحك عليه



دمــع عيني علـى الخدين .. جاري
وجرالي الما اظن بالناس .. جاري
ريـت اللي احبـه يكــون .. جاري
واشوفه بكــل صباح وكــــل مسيّه

حياتي عكب شخصك شلي بيه
وجميع اعضاي صارت شلل بيه
توديلي رسايل شلي بيه
اريدن شوفتك والكعدة سويه

روحي من الهجر ملت وسالت
عليه احباب لانشدت وسالت
الف دمعه الجرت مني وسالت
ولادمعه الجرت منهم عليه


احبابي شلون حالتكم بعدنه؟
شبدينة والوكت عنكم بعدنه؟
اذا انتو نسيتوا،احنةبعدنه
بذكركم كل صباح وكل مسيه


وحك أم الكرم والطيب حديثه
أريد اكابل المحبوب وأسمع حديثه
أريد أعرف قديم أخباره وحديثه
وبلياه الزمن ناعور ودار بيه

عيني العمت لو جيتوا تراكم
وعليهه الحزن ودموعي تراكم
حزنكم رايد اسالكم ترىكم
يعادل حزني والي صار بيه



أحبك من صغر عودي وسني
ومن حبك سقط شعري وسني
على حالي بچه شيعي وسني
وثالثهم مسيحي يون عليه